A moza que abortou e o contou

Nadal de 2024: a CORA (20) báixalle a regra por primeira vez desde o aborto. Ela estuda xornalismo; é segura, lista e autoesixente e está moi namorada -moito- do seu mozo. Este 24 de decembro a súa nai e a súa tía preparan a cea apuradas. O seu pai, o seu tío e o fillo deste, chegan tarde. A avoa coida do avó, que está enfermo e non pode case moverse. A súa curmá e o mozo aparecen e alguén fai comentarios sobre canto adelgazou ela. Por fin todas e todos sentan á mesa; falan do típico –que tal o traballo, que tal os estudos– até que Cora decide contar que abortou. Esta é a historia dunha moza que o contou e de como este relato desata debates, discusións, contradicións e novas revelacións nunha noite na que o fogar se converte nun núcleo de violencias. Por sorte, ALDARA (10), a irmá pequena de Cora, grava todo co teléfono.